ਸ਼ੇਅਰ ਬਾਜ਼ਾਰ ਲਈ 'ਬਲੈਕ ਥਰਸਡੇ': ਪੱਛਮੀ ਏਸ਼ੀਆ ਦੀ ਜੰਗ ਨੇ ਦਲਾਲ ਸਟਰੀਟ 'ਚ ਮਚਾਈ ਤਬਾਹੀ, ਨਿਵੇਸ਼ਕਾਂ ਦੇ ਅਰਬਾਂ ਰੁਪਏ ਸਵਾਹ

ਭਾਰਤੀ ਸ਼ੇਅਰ ਬਾਜ਼ਾਰ ਲਈ ਅੱਜ ਦਾ ਦਿਨ 'ਕਾਲਾ ਵੀਰਵਾਰ' (Black Thursday) ਸਾਬਤ ਹੋਇਆ। ਬੁੱਧਵਾਰ ਦੀ ਤੇਜ਼ੀ ਤੋਂ ਬਾਅਦ ਨਿਵੇਸ਼ਕਾਂ ਨੂੰ ਉਮੀਦ ਸੀ ਕਿ ਬਾਜ਼ਾਰ ਹੋਰ ਉਚਾਈਆਂ ਛੂਹੇਗਾ, ਪਰ ਵੀਰਵਾਰ ਸਵੇਰੇ ਆਏ ਗਲੋਬਲ ਸੰਕੇਤਾਂ ਨੇ ਖ਼ੁਸ਼ੀ ਨੂੰ ਮਾਤਮ ਵਿੱਚ ਬਦਲ ਦਿੱਤਾ। ਪੱਛਮੀ ਏਸ਼ੀਆ ਵਿੱਚ ਛਿੜੀ ਭਿਆਨਕ ਜੰਗ ਅਤੇ ਅੰਤਰਰਾਸ਼ਟਰੀ ਬਾਜ਼ਾਰਾਂ ਦੀ ਗਿਰਾਵਟ ਨੇ ਭਾਰਤੀ ਬਾਜ਼ਾਰ ਨੂੰ ਬੁਰੀ ਤਰ੍ਹਾਂ ਝੁਲਸਾ ਕੇ ਰੱਖ ਦਿੱਤਾ ਹੈ।

ਸੈਂਸੈਕਸ ਅਤੇ ਨਿਫ਼ਟੀ ਤਾਸ਼ ਦੇ ਪੱਤਿਆਂ ਵਾਂਗ ਢਹਿ-ਢੇਰੀ

ਕਾਰੋਬਾਰੀ ਸੈਸ਼ਨ ਸ਼ੁਰੂ ਹੁੰਦੇ ਹੀ ਬਿਕਵਾਲੀ ਦਾ ਅਜਿਹਾ ਦੌਰ ਚੱਲਿਆ ਕਿ ਸੈਂਸੈਕਸ ਅਤੇ ਨਿਫ਼ਟੀ ਸੰਭਲ ਨਹੀਂ ਸਕੇ।

ਬੰਬੇ ਸਟਾਕ ਐਕਸਚੇਂਜ ਦਾ ਸੂਚਕ ਅੰਕ 1600 ਅੰਕਾਂ ਤੋਂ ਵੱਧ ਫਿਸਲ ਕੇ 75,133 ਦੇ ਪੱਧਰ 'ਤੇ ਆ ਗਿਆ।

ਨੈਸ਼ਨਲ ਸਟਾਕ ਐਕਸਚੇਂਜ ਦਾ ਨਿਫ਼ਟੀ ਵੀ 510 ਅੰਕਾਂ ਦੀ ਭਾਰੀ ਗਿਰਾਵਟ ਨਾਲ 23,300 ਦੇ ਆਸ-ਪਾਸ ਕਾਰੋਬਾਰ ਕਰ ਰਿਹਾ ਹੈ।

ਗਿਫ਼ਟ ਨਿਫ਼ਟੀ (Gift Nifty): ਬਾਜ਼ਾਰ ਖੁੱਲ੍ਹਣ ਤੋਂ ਪਹਿਲਾਂ ਹੀ ਇਸ ਦੇ 550 ਪੁਆਇੰਟ ਡਿੱਗਣ ਨੇ ਸਾਫ਼ ਕਰ ਦਿੱਤਾ ਸੀ ਕਿ ਅੱਜ ਦਾ ਦਿਨ ਨਿਵੇਸ਼ਕਾਂ ਲਈ ਭਾਰੀ ਰਹਿਣ ਵਾਲਾ ਹੈ।

ਬਾਜ਼ਾਰ ਵਿੱਚ ਆਏ ਭੂਚਾਲ ਦੇ ਮੁੱਖ ਕਾਰਨ

ਮਾਹਿਰਾਂ ਅਨੁਸਾਰ ਬਾਜ਼ਾਰ ਦੇ ਡਿੱਗਣ ਪਿੱਛੇ ਤਿੰਨ ਵੱਡੇ ਕਾਰਨ ਹਨ:

ਪੱਛਮੀ ਏਸ਼ੀਆ ਵਿੱਚ ਜੰਗ ਦੀ ਅੱਗ: ਇਜ਼ਰਾਈਲ-ਈਰਾਨ ਟਕਰਾਅ ਹੁਣ ਸਿਰਫ਼ ਸਰਹੱਦਾਂ ਤੱਕ ਸੀਮਤ ਨਹੀਂ ਰਿਹਾ, ਸਗੋਂ 'ਐਨਰਜੀ ਇੰਫਰਾਸਟਰੱਕਚਰ' (ਊਰਜਾ ਦੇ ਕੇਂਦਰਾਂ) 'ਤੇ ਹੋ ਰਹੇ ਹਮਲਿਆਂ ਨੇ ਦੁਨੀਆ ਭਰ ਦੀ ਸਪਲਾਈ ਚੇਨ ਨੂੰ ਖ਼ਤਰੇ ਵਿੱਚ ਪਾ ਦਿੱਤਾ ਹੈ। ਕੱਚੇ ਤੇਲ ਦੀਆਂ ਕੀਮਤਾਂ ਵਧਣ ਦੇ ਡਰ ਨੇ ਨਿਵੇਸ਼ਕਾਂ ਵਿੱਚ ਦਹਿਸ਼ਤ ਪੈਦਾ ਕਰ ਦਿੱਤੀ ਹੈ।

ਅਮਰੀਕਾ ਤੋਂ ਮਾੜੇ ਸੰਕੇਤ:

ਵਿੱਚ ਥੋਕ ਮਹਿੰਗਾਈ ਵਧਣ ਕਾਰਨ ਉੱਥੋਂ ਦੇ 'ਡਾਓ ਜੋਂਸ' ਵਿੱਚ 750 ਅੰਕਾਂ ਦੀ ਵੱਡੀ ਗਿਰਾਵਟ ਦਰਜ ਕੀਤੀ ਗਈ। ਇਸ ਦੇ ਨਾਲ ਹੀ ਅਮਰੀਕੀ ਫੈਡਰਲ ਰਿਜ਼ਰਵ ਨੇ ਵਿਆਜ ਦਰਾਂ ਵਿੱਚ ਕੋਈ ਬਦਲਾਅ ਨਹੀਂ ਕੀਤਾ, ਪਰ ਚੇਤਾਵਨੀ ਦਿੱਤੀ ਹੈ ਕਿ ਜੰਗ ਕਾਰਨ ਮਹਿੰਗਾਈ ਵਧ ਸਕਦੀ ਹੈ, ਜਿਸ ਨਾਲ ਵਿਆਜ ਦਰਾਂ ਲੰਬੇ ਸਮੇਂ ਤੱਕ ਉੱਚੀਆਂ ਰਹਿਣਗੀਆਂ।

ਜਾਪਾਨ ਤੋਂ ਲੈ ਕੇ ਹਾਂਗਕਾਂਗ ਤੱਕ ਦੇ ਸਾਰੇ ਪ੍ਰਮੁੱਖ ਏਸ਼ੀਆਈ ਬਾਜ਼ਾਰ ਲਾਲ ਨਿਸ਼ਾਨ 'ਤੇ ਕਾਰੋਬਾਰ ਕਰ ਰਹੇ ਹਨ। ਵਿਸ਼ਵ ਪੱਧਰ 'ਤੇ ਮੰਦੀ ਦਾ ਡਰ ਨਿਵੇਸ਼ਕਾਂ ਨੂੰ ਬਾਜ਼ਾਰ ਵਿੱਚੋਂ ਪੈਸਾ ਕੱਢਣ ਲਈ ਮਜਬੂਰ ਕਰ ਰਿਹਾ ਹੈ।

ਕੁੱਝ ਹੀ ਮਿੰਟਾਂ ਦੇ ਕਾਰੋਬਾਰ ਵਿੱਚ ਨਿਵੇਸ਼ਕਾਂ ਦੇ ਲੱਖਾਂ-ਕਰੋੜ ਰੁਪਏ ਡੁੱਬ ਗਏ ਹਨ। ਅਰਥਸ਼ਾਸਤਰੀਆਂ ਦਾ ਮੰਨਣਾ ਹੈ ਕਿ ਜੇਕਰ ਜੰਗ ਦੀ ਸਥਿਤੀ ਜਲਦ ਨਾ ਸੁਧਰੀ, ਤਾਂ ਆਉਣ ਵਾਲੇ ਦਿਨਾਂ ਵਿੱਚ ਬਾਜ਼ਾਰ ਹੋਰ ਗੋਤਾ ਲਗਾ ਸਕਦਾ ਹੈ।